2015-06-26
„საქართველოს სახელმწიფო ელექტროსისტემის“ სასწავლო ცენტრის კურსდამთავრებულები კომპანიაში დასაქმდნენ
„საქართველოს სახელმწიფო ელექტროსისტემის“ სასწავლო ცენტრს კურსდამთავრებულების ახალი ნაკადი ჰყავს. ახალგაზრდა ინჟინერთა სწავლება-გადამზადებისა და კვალიფიკაციის ასამაღლებელი კურსი კიდევ ერთმა ჯგუფმა დაასრულა, რომელსაც პრაქტიკული და თეორიული მეცადინეობების კურსი ერთი წლის განმავლობაში უტარდებოდა. 13 -ვე კურსდამთავრებული სსე-ის სხვადასხვა რეგიონალურ ქსელში, დეპარტამენტსა და ქვესადგურში დასაქმდა.
26 ივნისს გამართულ დაჯილდოების ცერემონიაზე, სასწავლო ცენტრის კურსდამთავრებულებს სერთიფიკატები სსე-ის მმართველთა საბჭოს თავმჯდომარემ სულხან ზუმბურიძემ გადასცა. მან მიულოცა კურსდამთავრებულებს და აღნიშნა: ”საქართველოს სახელმწიფო ელექტროსისტემა” აღნიშნულ პროგრამას 2005 წლიდან, უკვე მე-10 წელია, ახორციელებს. ამ პერიოდის განმავლობაში ეს პროგრამა გაიარა 140-მა სტუდენტმა, საიდანაც სსე-ში დასაქმდა დაახლოებით 100-მდე კურსდამთავრებული. თქვენ ხართ ამ პროგრამის საიუბილეო ნაკადი. წელს კომპანიაში დავასაქმეთ ყველა კურსდამთავრებული. ასევე მინდა აღვნიშნო, რომ ძალიან გაგიმართლათ, რადგან თქვენი დასაქმება დაემთხვა თქვენთვის ძალიან საინტერესო პერიოდს, რადგან სსე-ში მიმდინარეობს ძალიან მნიშვნელოვანი საერთაშორისო და სსე-ს მიერ წარმოებული პროექტები, რომლებში მონაწილეობა საშუალებას მოგცემთ, ძალიან ბევრი რამ ისწავლოთ თქვენი პროფესიული უნარების განსავითარებლად და პროფესიონალებად ჩამოსაყალიბებლად, ” – განაცხადა სულხან ზუმბურიძემ.
სსე-ის სასწავლო ცენტრი ახალგაზრდა ინჟინერთა სწავლება-გადამზადებისა და კვალიფიკაციის ასამაღლებელი კურსების გასავლელად სტუდენტთა ახალ ნაკადს 2015 წლის შემოდგომაზე მიიღებს.
